ელექტრონულ ზედნადებთან მუშაობა

დღეიდან უკვე შეგიძლიათ გამოწეროთ ელექტრონული სასაქონლო ზედნადებით invoice.ge-ში!

შეგახსენებთ, რომ 2012 წლის 1 აპრილიდან, ელექტრონული სასაქონლო ზედნადებით სარგებლობა სავალდებულო ხდება ყველა ორგანიზაციისთვის.

ამ პოსტის მიზანია წარმოგიდგინოთ თუ როგორ უნდა ისარგებლოთ ახალი შესაძლებლობით ჩვენს პროგრამაში.

ღია პროექტი პროგრამისტებისთვის

დავიწყებთ მცირე ანონსით, რომელიც პროგრამისტებს დააინტერესებს.

საგადასახადო პორტალში ატვირთვის მოდული, რომელსაც invoice.ge იყენებს, ხელმისაწვდომია ყველასათვის, შემდეგ მისამართზე http://github.com/dimakura/rs.ge. თუ გაქვთ თქვენი პროგრამა და გინდათ საგადასახადოს ვებ-სერვისებთან მისი მიბმა, ეს ძალიან მარტივი გასაკეთებელია ამ მოდულის მეშვეობით.

გარდა invoice.ge-სა, ერთი ძალიან მსხვილი ორგანიზაცია უკვე იყენებს ამ მოდულს თავისი ყოველდღიური საქმიანობისთვის. იმედი გვაქვს, რომ სხვებისთვისაც არ იქნება ის უსარგებლო.

პოსტის დარჩენილი ნაწილი განკუთვნილია მათთვის, ვისაც პროგრამირებაზე ძალიან აინტერესებს თუ როგორ უნდა გამოიყენოს მზა საშუალებები.

ახალ სასაქონლო ზედნადებთან დაკავშირებით, მოგვიწია რიგი ცვლილების შეტანა ჩვენს პროგრამაში. სწორედ ამ ცვლილებების განხილვით დავიწყებთ. ბოლოს კი ვნახავთ, თუ რამდენად მარტივია საგადასახადო პორტალში სასაქონლო ზედნადების გაგზავნა.

დავიწყოთ ზომის ერთეულებში შეტანილი ცვლილებებით.

ზომის ერთეულები

ზომის ერთეულების მხარდაჭერა invoice.ge-ში პირველი დღიდან იყო ჩადებული. თუმცა ახლა საგადასახადომაც დაამატა თავისი ერთეულები. სასურველია, რომ პროგრამას ზუსტად მიუთითოთ თქვენი და საგადასახადოს ერთეულებ შორის შესაბამისობა.

შესაბამისობის განსაზღვრისათვის დამატებულია ველი RS ერთეული, ზომის ერთეულის რედაქტირების ფორმაში. აარჩიეთ სიიდან (ეს არის საგადასახადოს სია) სასურველი ზომის ერთეული და დააჭირეთ ღილაკზე “ერთეულის შენახვა”. თუ ვერ იპოვით სასურველ ერთეულს, მაშინ დატოვეთ ველი ცარიელი ან აარჩიეთ ერთეული სახელად “სხვა”, რომელიც სიის ბოლოშია განთავსებული.

შენახვის შემდეგ შესაბამისობა საგადასახადოს ერთეულთან კარგად ჩანს ერთეულების სიაშიც. თუ ერთზე მეტი ზომის ერთეული გაქვთ, მაშინ აღნიშნული პროცედურა უნდა გაიმეოროთ თითოული მათგანისთვის.

ცვლილებებია შესული ასევე ტრანსპორტირების მონაცემების მართვაში. როგორც იცით, ტრანსპორტირების მონაცემების შევსება, ახალ ზედნადებში უფრო დეტალიზირებული გახდა.

თუ როგორ უნდა გაიმარტივოთ მათთან მუშაობა, შემდეგ განყოფლებაშია აღწერილი.

ტრანსპორტის მონაცემების მართვა

invoice.ge-ში შეგიძლიათ ტრანსპორტის მონაცემების წინასწარ განსაზღვრა. შენახული სატრანსპორტო მონაცემების მეშვეობით მომავალში სწრაფად შეგიძლიათ შეავსოთ ზედნადების შესაბამისი ველები.

ვნახოთ, თუ როგორ ხდება ეს. ამისათვის აარჩიეთ ძირითად მენიუდან “პარამეტრები”, ხოლო ქვემენიუდან კი — “შეკვეთები”: გვერდის ქვედა ნაწილში განთავსებულია ტრანსპორტის მონაცემების ცხრილი. ის ჯერ-ჯერობით ცარიელია: ახალი ჩანაწერის დასამატებლად დააჭირეთ ღილაკზე “ტრანსპორტის დამატება”. შეავსეთ გამოსული ფორმა. შევნიშნოთ, რომ არაა აუცილებელი ამ ფორმის ყველა მონაცემის ზედმიწევნით შევსება: მათი შეცვლა უშუალოდ ტრანსპორტირების პარამეტრების მითითებისას შეგიძლიათ. აქ შეიყვანეთ მხოლოდ ის მონაცემები, რომლებიც ხშირად გამეორდება. შეგიძლიათ შექმნათ ნებისმიერი სასურველი რაოდენობა ტრანსპორტის ჩანაწერებისა.

ჩვენი შემდეგი ნაბიჯი იქნება rs.ge სერვისის აქტივაცია invoice.ge-ში.

rs.ge სერვისის აქტივაცია

იმისათვის, რომ invoice.ge-დან შეიძლებოდეს მონაცემების გაგზავნა საგადასახადო პორტალში, საჭიროა შესაბამისი სერვისის გააქტიურება. ამისათვის თქვენ დაგჭირდებათ თქვენი ორგანიზაციის მომხმარებლის სახელის და პაროლის ცოდნა, რომელსაც თქვენი მთავარი ბუღალტერი იყენებს rs.ge-ში შესასვლელად. თუმცა გვინდა ხაზგასმით ავღნიშნოთ, რომ ჩვენ არ ვინახავთ თქვენი ორგანიზაციის მთავარ პაროლს: ის  ერთჯერადად არის საჭირო სერვისის გააქტიურების მიზნით. მეტი დაზღვეულობისთვის, შეგიძლიათ ამ პაროლის შეცვლა, მას შემდეგ რაც გააქტიურებთ ჩვენს სერვისს.

სერვისის გააქტიურება შეგიძლიათ მენიუდან “პარამეტრები” > “rs.ge” გამოსულ ფორმაში შეიყვანეთ თქვენი ორგანიზაციის მომხმარებლის სახელი და პაროლი (რომელსაც rs.ge-ზე შესვლისას იყენებთ). შემდეგ დააჭირეთ ღილაკს “სერვისის გააქტიურება”. ოპერაციის დასრულების შემდეგ ეკრანზე დაინახავთ შემდეგი სახის შეტყობინებას: ის გაცნობებთ, რომ rs.ge სერვისი აქტივირებულია თქვენი ორგანიზაციისთვის. სერვისის აქტივაცია ერთჯერადი მოქმედებაა და არაა საჭირო მისი ხელმეორედ გამეორება. თუ ზემოაღწერილი ეტაპები წარმატებით გაიარეთ, ამითი დაასრულეთ კიდეც ყველა მოსამზადებელი სამუშაო.

ახლა უკვე შეგიძლიათ ახალი შეკვეთის გამოწერა და მისი ატვირთვა საგადასახადო პორტალში. მოდით ვნახოთ თუ როგორ კეთდება ეს.

ახალი შეკვეთის გამოწერა

თუ invoice.ge-ს მომხმარებელი ხართ, ალბათ უკვე კარგად იცით თუ როგორ უნდა გამოწეროთ შეკვეთა.

გამოსახულებაზე მოყვანილია ერთ-ერთი ასეთი ახლად გამოწერილი შეკვეთა. ქვედა მარცხენა ნაწილში განთავსებული ჩანართებიდან აარჩიეთ “ტრანსპორტირება”. სწორედ ეს ჩანართი გამოიყენება ტრანსპორტირების პარამეტრების და ზედნადების საგადასახადო პორტალში ატვირთვის სამართავად. პირველ რიგში მოდით განვსაზღვროთ ჩვენი შეკვეთის (სასაქონლო ზედნადების) ტრანსპორტირების პარამეტრები. ამისათვის დააჭირეთ ღილაკზე “ტრანსპორტირების პარამეტრები”. გამოსული ფორმის მარჯვენა ნაწილში განთავსებულია ტრანსპორტის მონაცემების სია, რომლებიც ჩვენ წინა განყოფილებაში შევქმენით. ტრანსპორტის მონაცემების სწრაფად შესავსებად შეგიძლიათ ამ სიის ელემენტზე დაწკაპებით. ალტერნატიულად შეგიძლიათ მონაცემების ხელით შევსება. შეინახეთ ტრანსპორტირების მონაცემები. ახლა შეკვეთა უკვე მზადაა საგადასახადო პორტალში გასაგზავნად. დააჭირეთ ღილაკზე “გადავაგზავნო საგადასახადო პორტალში”. გამოსულ ეკრანზე ჩანს გასაგზავნი მონაცემების შემაჯამებელი ცხრილი. მას შემდეგ რაც დარწმუნდებით, რომ ყველაფერი სწორადაა შეყვანილი დააჭირეთ ღილაკზე “პორტალში გადაგზავნა”. გადაგზავნის დასრულების შემდეგ მონაცემები აისახება თქვენს საგადასახადო პორტალში (აუცილებლად შედით rs.ge-ზე და დარწმუნდით ამაში). ასევე ზედნადებს მიენიჭება ნომერი და განისაზღვრება ტრანსპორტირების დაწყების დრო.

აი, როგორ გამოიყურება ვიზუალურად ტრანსპორტირების ჩანართი საგადასახადოში ატვირთვის შემდეგ: ახლა თქვენ შეგიძლიათ:

1. დასრულება — ზედნადების ტრანსპორტირების დასრულება. გაითვალისწინეთ, რომ ტრანსპორტირების დასრულების შემდეგ უკვე არ შეგეძლებათ ზედნადებში რაიმე სახის ცვლილების შეტანა;
2. გაუქმება — თქვენ შეგიძლიათ ზედნადების გაუქმება;
3. სინქრონიზაცია — თქვენ შეგიძლიათ ზედნადების პარამეტრების სინქრონიზაცია საგადასახადოს პორტალში არსებულ მონაცემებთან (თუ ამის საჭიროება წარმოიშვა);
4. [ტრანსპორტირების] პარამეტრები — აქ შეგიძლიათ ტრანსპორტირების პარამეტრებში მცირე შესწორების შეტანა.

მას შემდეგ რაც თქვენი საწყობიდან გასული ტვირთი ჩავა დანიშნულების ადგილას, თქვენ უნდა “დაასრულოთ” სასაქონლო ზედნადების ტრანსპორტირება. დააჭირეთ ამისთვის ღილაკზე “დასრულება”. გაითვალისწინეთ: დასრულებული ზედნადების შეცვლა, გაუქმება ან წაშლა შეუძლებელია! ზედნადებზე დასრულებული ტრანსპორტირებით თქვენ შეგიძლიათ ასევე ანგარიშ-ფაქტურის გამოწერა. ეს ძალიან მარტივად ხდება ღილაკზე “ა/ფ გაგზავნა საგადასახადო პორტალში” დაჭერით. ამ ხერხით შექმნილი ანგარიშ-ფაქტურა შეინახება თქვენს საგადასახადო პორტალში. თუმცა ის ჯერ არაა გადაგზავნილი მყიდველზე. ამ ეტაპზე invoice.ge-ში არაა ჩადებული ანგარიშ-ფაქტურის მყიდველზე გაგზავნის ფუნქცია. ის უახლოეს მომავალში გამოჩნდება. მანამდე შექმნილი ფაქტურის გადაგზავნა უნდა მოხდეს თქვენს მიერ rs.ge-ს სტანდარტული ფორმის მეშვეობით.

შეჯამება

ამ პოსტში ჩვენ ვნახეთ თუ როგორ უნდა მოამზადოთ პროგრამა საგადასახადო პორტალში ზედნადების ელექტრონული სახით გასაგზავნად. ასევე ვნახეთ თუ როგორ გამოიყურებოდა ზედნადების გაგზავნის პროცედურა. პროგრამა ასევე მნიშვნელოვნად გიმარტივებთ ზედნადების საფუძველზე ანგარიშ-ფაქტურის გამოწერის საკითხს.

ელექტრონული სასაქონლო ზედნადები invoice.ge-ში

ალბათ უკვე იცით, რომ ა.წ. 1 აპრილიდან სავალდებულო ხდება ელექტრონული ზედნადების ფორმის შევსება და მისი ატვირთვა საგადასახადო პორტალში. ეს, ერთის მხრივ, მისასალმებელი ცლილებაა, ვინაიდან მნიშვნელოვნად გაამარტივებს ზედნადების წარმოების პროცედურას. თუმცა, მეორეს მხრივ, ამ სიახლეს ბევრი მეწარმე მოუმზადებელი ხვდება.

თუ invoice.ge-ს მომხმარებელი ბრძანდებით, ახალი სტანდარტებით ზედნადების შევსება არ იქნება დაკავშირებული რაიმე სირთულესთან.

2012 წლის 19 მარტს ჩვენ გამოუშვებთ ჩვენი პროგრამის შემდგომ განახლებას, რომლის წყალობითაც invoice.ge-ში შევსებული ყოველი ზედნადები ადვილად აიტვირთება თქვენს საგადასახადო პორტალში. თქვენ არ მოგიწევთ მონაცემების ორჯერ შეყვანა.

ამ მიმართულებით ჩვენ უკვე შევასრულეთ ძირითადი სამუშაო. ახლა კი პროგრამის დამატებითი ტესტირებით და დახვეწით ვართ დაკავებულები. ჩვენ ასევე მჭიდროდ ვთანამშრომლობთ შემოსავლების სამსახურთან, რათა უზრუნველყოთ ჩვენი პროგრამის კანონმდებლობასთან მაქსიმალური შესაბამისობა.

19 მარტს ჩვენ მზად ვიქნებით წარმოგიდგენთ ჩვენი ნამუშევარი. იმედს ვიტოვებთ, რომ ის ბევრ თქვენთაგანს შეუმსუბუქებს სამუშაოს.

გამოვიდა invoice.ge

მოხარულები ვართ გაცნობოთ, C₁₂-ის პირველი პროგრამული პროდუქტის — invoice.ge-ს — გამოსვლის შესახებ. invoice.ge განკუთვნილია თქვენი მაღაზიის ყიდვა-გაყიდვის და საწყობ(ებ)ის სამართავად.

რას წარმოადგენს ეს პროგრამა და რატომ შეიძლება დაგაინტერესოთ მან?

დავიწყოთ იმით, რომ ეს არის ინტერნეტ-პროგრამა. ერთადერთი, რაც მასთან სამუშაოდ დაგჭირდებათ, არის ინტერნეტთან შეერთებული კომპიუტერი.

თქვენ არ მოგიწევთ არაფრის ინსტალირება და არც ძვირადღირებული პროგრამისტის დაქირავება. ეს ის არაა, რაც თქვენ გგონიათ — ყველაფერი გაცილებით მარტივია. აკრიფეთ თქვენს ბრაუზერში http://invoice.ge და იმუშავეთ! ჩვენ უკვე ვიზრუნეთ იმაზე, რომ ყველაზე რთული მოქმედებები შეგვესრულებინა და ავტომატიზაციამდე მიგვეყვანა.

ამ პროგრამის მეშვეობით თქვენ შეგეძლებათ ადვილად მართოთ თქვენი კომპანიის საწყობ(ებ)ი და გასაყიდი საქონლის ნუსხა. ასევე ადვილია თქვენი კლიენტების და მომწოდებლების აღრიცხვა. ოპერაციულად, თქვენ შეგეძლებათ გაყიდვების, საწყობებს შორის საქონლის მოძრაობის და შესყიდვების იოლად წარმართვა.

გარდა მოხერხებულობისა, ასე მუშაობას ის უპირატესობა გააჩნია, რომ თქვენ არ ხარჯავთ დროს იმაზე, რაც რთული გასაკეთებელია. თქვენ არ გიხდებათ სერვერების მოვლა, მონაცემთა რეზერვირება, პროგრამის მხარდაჭერა და კომპიუტერის რესურსებზე ზრუნვა. ამ ყველაფერს თქვენთვის ვიღაცის ჯადოსნური ხელები ამზადებს და თქვენ მხოლოდ ის დაგრჩენიათ, რომ მიხედოთ იმას, რაც საუკეთესოდ გამოგდით — თქვენს ბიზნესს.

მაინც როგორ გამოიყურება ეს პროგრამა? ალბათ საუკეთესო გზა ამის გასაგებად არის ყველაფრის საკუთარი თვალით ნახვა, თუმცა ჩვენ აქ შევეცადეთ გარკვეული რეზიუმირება გაგვეკეთებინა პროგრამის ძირითადი ღირსებებისა.

მეტი თვალსაჩინოებისთვის, ქვემოთ მოყვანილია პროგრამის რამდენიმე ეკრანი.

აი ასე გამოიყურება საქონლის თვისებების გვერდი (დააჭირეთ გასადიდებლად):

მასზე შეგიძლიათ დაინახოთ ინფორმაცია საქონლის რაოდენობის (საწყობებად) და თვითღირებულების შესახებ. ეს პროგრამის ძალიან მძლავრი საშუალებაა. invoice.ge ავტომატურად ითვალისწინებს ნებიმიერი სახის ოპერაციას, და თქვენ ყოველთვის იცით ამ ორი სიდიდის (რაოდენობა საწყობში და თვითღირებულება) ზუსტი მნიშვნელობა.

შემდეგ ეკრანად ჩვენ ავარჩიეთ შეკვეთის თვისებების გვერდი (დააჭირეთ გასადიდებლად):

ის შეიცავს არა მხოლოდ გაყიდული საქონლის შესახებ ინფორმაციას, არამედ მასში გვაქვს ჩადგმული გადახდების ისტორია. ეს საშუალებას გაძლევთ ადევნოთ თვალი შეკვეთას, გამოწერის მომენტიდან მის საბოლოო შესრულებამდე.

პროგრამას განსაკუთრებულ ხიბლს მატებს შესანიშნავი ამოსაბეჭდი ფორმები. ეს ფორმები კარგად დაფორმატებული PDF დოკუემენტებია, რაც ნებისმიერი კომპიუტერიდან მათი პრინტერზე გადატანას წამიერ და ზუსტ ოპერაციად აქცევს. შეგიძლიათ თქვენი თვალით დარწმუნდეთ ამაში. ნახეთ, თუ როგორ გამოიყურება პროგრამაში დამზადებული ინვოისი და სასაქონლო ზედნადები.

კიდევ ბევრის თქმა შეიძლება. თუმცა ამას სხვა დროისთვის შემოვინახავთ. ამ სტატიის მიზანი, ხომ მხოლოდ invoice.ge-ს წარდგენაა თქვენთვის.

პროგრამა ფასიანია, თუმცა ფასები საკმაოდ მოკრძალებულია; ამასთან, ყოველ ახალ გახსნილ ორგანიზაციაზე, მოქმედებს 30 დღიანი უფასო პერიოდი.

რომ შევაჯამოთ, invoice.ge-ს ძლიერი მხარეებია:

1. ის მარტივია დასანერგად და გამოსაყენებლად;
2. ის ხელმისაწვდომია საქართველოში და მის ფარგლებს გარეთ, ყველგან, სადაც არ უნდა იმყოფებოდეთ;
3. მისი მეშვეობით შეგიძლიათ მრავალი საწყობის მართვა (მათი რაოდენობა არაა ლიმიტირებული);
4. რამდენიმე მომხმარებელს შეუძლია ერთდროულად მუშაობა;
5. თქვენ ყოველთვის იცით, რომელ საწყობში რამდენი საქონელი გაქვთ;
6. თქვენ ყოველთვის იცით საქონლის თვითღირებულება;
7. პროგრამა საკმაოდ იაფია და აქვს 30 დღიანი უფასო პერიოდი.

შესაძლოა დაგაინტერესოთ იმანაც თუ როგორ განვითარდება პროგრამა მომავალში?

ჩვენ ვაპირებთ კიდევ უფრო მეტი სიახლის დანერგვას. ჩვენ უკვე ვმუშაობთ პროგრამის ახალ ვერსიაზე, რომელიც ბევრად უფრო მარტივი, ბევრად უფრო ფუნქციონალური და ბევრად უფრო გასაოცარი იქნება, ვიდრე მიმდინარე ვერსია.

დაინტერესდით? მაშინ გადადით http://invoice.ge-ზე, დარეგისტრირდით და მიეცით მას შანსი მოგეწონოთ.

გამარჯობა სამყარო!

ჩვენ ინტენსიურად ვემზადებით 2012 წლის 23 იანვარს ჩვენი პირველი პროექტის invoice.ge-ს გასაშვებად.

გვეწვიეთ 23 იანვრის შემდეგ!